ملا پناه واقف  1717  قازاخ محالی نین صلاحی کندینده آنادان اولموش دیر. باباسی مهدی آدیندا بیر کندلی دیر. واقف 18 اینجی عصر آذربایجان ادبیاتی نین ان باشدا گلن شاعری اولوب قاراباغ خانلیغی سیاسی حیاتیندا موثر رولو الموش، آذربایجان فرهنگینه خدمت اتمیش و شعر و ادبیاتا ینی بیر استقامت ورمیشدیر. 

گلمه میش

هر گئدن گلمیش، منیم اول غمگساریم گلمه میش

ای گوزوم، آغلا کیم، چشم خماریم گلمه میش

گئتمیش ایدی اختیاریم بئله سینجه یاریمین

چونکی یاریم گلمه میش، هم اختیاریم گلمه میش

 

من بو دردایله اگر اولسم، مزاره قویمایین

اوستومه اول طوطی دیللی شوخ نگاریم گلمه میش

حسرتیندن زعفرانه دونسه روییم، یوخ عجب

قویموش هجراندا منی، بیر گلعذاریم گلمه میش

 

دئمه سین، ((واقف))، اجل کیم، گلسه مندن جان آلیر

کیمدیر اونا جان وئرن، فرمان یاریم گلمه میش؟

ای گلعذارین کاغذی

آیدین اولسون گوزلریم کیم، گلدی یارین کاغذی

کونلومی شاد ائیله دی گوزل نگارین کاغذی

اوخودوم، اوپدوم، گوزه سورتدوم، دئدیم: صد مرحبا!

گوزوم اوسته وار یئرین، ای گلعذارین کاغذی



سندن آیری اول قدر قان آغلادیم کیم، دمبدم

یاشه باتیب، ایسلانیب صبر و قرارین کاغذی

چوخ چکیردیم انتظارین، گوزلریم یولدا ایدی

شکرلله، گلدی اول چشم خمارین کاغذی



غیری یاری، ای گوزل، قیلما بدل سن ((واقفه))

یادگار ساخلا، بو اولسون اعتبارین کاغذی

فارس دیلینده بیر مثنوی

شنیدستم که مجنون دل آزار                          چو شد از مردن لیلی خبردار

گریبان چاک زد با آه و افغان                         بسوی تربت لیلی شتابان

در آنجا کودکی دید ایستاده                            بهر سو دیده ی حسرت گشاده

نشان قبر لیلی را از او جست                        چو ان کودک بخندید و بدو گفت

تو ای مجنون ترا گر عقل بودی                      ز من کی این تمنا می نمودی

میان قبرها را جستجو کن                             ز هر مرقد کفی از خاک بو کن

ز هر خاکی که بوی عشق برخواست               یقین کن تربت لیلی همانجاست

تو هم واقف در این دیر جگرسوز                   رموز عشق از آن کودک بیاموز.

 دورنالار

بیر زامان هاوادا قاناد ساخلایین

سوزوم واردیر منیم سیزه، دورنالار!

قاتارلاشیب نه دیاردان گلیرسیز؟

بیر خبر وئرسه نیزبیزه، دورنالار



سیزه مشتاق دورور بغداد ائللری

گوزله یه- گوزله یه قالیب یوللاری

آستا قاناد چالین، غافل تئللری

حیف دیر، سالار سیز دوزه، دورنالار!



خیلی وقتدیر یارین فراقیندایام

پروانه تک حسنین چراغیندایام

بیر آلا گوزلی نین سوراغیندایام

گورونورمی، گورون گوزه، دورنالار!



من سئومیشم آلا گوزون سورمه سین

بدنظر کسیبن، زیان وئرمه سین

ساقین گزین، لاچین گوزو گورمه سین

قورخورام صفینیزی پوزا، دورنالار!



نازنین- نازنین ائدرسیز آواز

روحلار تازه لنیر، اولور سرافراز

((واقفین)) ده کونلو چوخ ائدر پرواز

هردم سیزین ایله گزه، دورنالار!

آغلادین

منی غرق ائله دین غم دریاسینا

ای چشم خماریم، نئچون آغلادین؟

ای گوزوم، نه دگیب کوکرک کونلونه؟

ای شیرین گفتاریم، نئچون آغلادین؟



گردنینده زلفون تر سنبل کیمی

سونادان اوزولموش قارا تئل کیمی

سن گرک گوله سن قیزیل گول کیمی

ای لاله رخساریم، نئچون آغلادین؟



اولمایا سن منی بی اقرار ساندین

ظرافت ائله دیم، اونا ایناندیم

نه دگدی کونلونه، نه دن بولاندین

دیشلری مرواریم، نئچون آغلادین؟



باغریم باشین شان- شان ائله د ین، دلدین

دونوم گوزلرینه، آز آغلا، اولدون

دئیه ردین، گولردین، بئله دئییلدین

منیم جادوگریم، نئچون آغلادین؟



هر کس گورن دمده اوز سیرداشینی

مگر توکر قاباغینی، قاشینی؟

اودا یاخدین جگریمین باشینی

واقف دئییر: دلداریم، نئچون آغلادین؟